Kolalaus eða hefðbundinn mótor – hvað þýðir brushless á rafhlöðuverkfærum?
Ef þú hefur skoðað rafhlöðuverkfæri undanfarin ár hefurðu líklega rekist á orðið „Brushless“ eða „kolalaus mótor“.
En hvað þýðir það í raun og skiptir það einhverju máli?
Stutta svarið er já. Kolalausir mótorar eru almennt skilvirkari, slitna minna og gera framleiðendum kleift að ná miklu afli úr litlum mótor. Í rafhlöðuverkfærum hefur þetta sérstaklega mikla þýðingu þar sem að vélin er jú ekki í sambandi við rafmagn í veggnum.
Hver er munurinn á kolamótor og kolalausum mótor?
Hefðbundinn rafmótor notar kol sem liggja að snúningshluta mótorsins og flytja rafstraum yfir á hann.
Þessi tækni hefur verið notuð í áratugi og virkar vel, en kolin skapa núning, hita og slitna með tímanum. Hluti orkunnar úr rafhlöðunni tapast því í stað þess að skila sér í vinnu mótorsins.
Í kolalausum mótor, eða brushless mótor, eru hvorki kol né hefðbundinn straumskiptir. Rafeindastýring sér þess í stað um straumskiptinguna og stýrir straumnum til vafninga mótorsins eftir snúningshraða og álagi.
Niðurstaðan er skilvirkari og nákvæmari mótorstýring.
Meiri vinna úr sömu rafhlöðu
Þetta er einn mikilvægasti kosturinn við brushless-tæknina.
Í rafhlöðunni er takmarkað magn af orku. Því minni orka sem tapast í hita, núning og önnur töp, því meiri orka er eftir til þess að vinna verkið.
Kolalaus mótor getur því almennt gert meiri vinnu úr sömu rafhlöðu en sambærileg eldri mótorhönnun.
Nákvæmur munur fer auðvitað eftir verkfærinu, mótornum, stýringunni og álaginu. Það er því ekki hægt að segja að öll brushless verkfæri endist einhverja ákveðna prósentu lengur. Oft er þó talað um allt að 40% betri nýtni.
En betri orkunýtni hefur annan kost sem gleymist oft.
Minni rafhlaða – léttara verkfæri
Við þurfum ekki alltaf að nota stærstu mögulegu rafhlöðuna.
Þegar mótorinn nýtir orkuna betur getur minni rafhlaða gefið nægan vinnutíma fyrir mjög mörg verkefni.
Og minni rafhlaða þýðir léttara verkfæri.
Það getur skipt miklu þegar verkfærið er í hendinni klukkutímum saman, sérstaklega þegar verið er að skrúfa, bora, vinna fyrir ofan höfuð eða halda verkfærinu með annarri hendi.
5 Ah rafhlaða gefur vissulega meiri vinnutíma en 2 Ah rafhlaða af sömu gerð. En ef 2 Ah rafhlaðan dugar vel fyrir verkefnið, hvers vegna að bera auka þyngd allan daginn?
Besti rafhlöðupakkinn er ekki alltaf sá stærsti – heldur sá minnsti sem ræður vel við verkefnið.
Þróunin er sú að sífellt sjaldnar þarf stóra og þunga rafhlöðu til að komast í gegnum hefðbundin verkefni án tíðra rafhlöðuskipta.
Nútíma lithium-ion rafhlöður, brushless mótorar og betri rafeindastýringar hafa breytt því töluvert.
Stórar rafhlöður eiga samt sinn stað
Þetta þýðir auðvitað ekki að stór rafhlaða sé óþörf.
Slípirokkar, stórir högglyklar, sagir og önnur orkufrek verkfæri geta bæði þurft mikinn straum og eytt mikilli orku. Þar getur 4 Ah, 5 Ah eða stærri rafhlaða verið mun skynsamlegri. Stærri rafhlöðupakki getur ekki aðeins lengt vinnutímann heldur einnig skilað meiri straumi þegar verkfærið er undir miklu álagi, eftir uppbyggingu rafhlöðunnar og verkfærisins.
En það er lítil ástæða til að bera sömu stóru rafhlöðuna undir lítilli skrúfvél ef 2 Ah rafhlaða vinnur verkið án vandræða.
Lítil rafhlaða þegar þyngd og lipurð skipta mestu. Stærri rafhlaða þegar aflþörf og vinnutími ráða ferðinni.
Fleiri kostir kolalausra mótora
Betri orkunýtni er aðeins einn kosturinn.
Þar sem engin kol eru í mótornum er einn hefðbundinn slitflötur horfinn. Ekki þarf að endurnýja kol og enginn núningur verður milli kola og straumskiptis.
Kolalaus tækni getur einnig gert mótorinn nettari og hjálpað til við að draga úr hitamyndun.
Helstu kostirnir eru því:
Betri orkunýtni
Lengri vinnutími úr sömu rafhlöðu
Möguleiki á minni og léttari rafhlöðu
Minni hitamyndun
Minna slit og viðhald
Mikið afl úr nettum mótor
Nákvæmari rafræn mótorstýring
Er brushless alltaf betra?
Orðið „Brushless“ er ekki sjálfkrafa gæðastimpill.
Vel hannaður hefðbundinn kolamótor getur verið mjög góður, öflugur og endingargóður. Mótorinn er líka aðeins einn hluti verkfærisins.
Gæði gíra, lega, rafhlöðu, rafeindastýringar og verkfærisins sjálfs skipta ekki síður máli.
En þegar tvö sambærileg og vel hönnuð rafhlöðuverkfæri eru borin saman hefur kolalausi mótorinn verulega tæknilega kosti.
Brushless og FIXTEC F20+
Flest verkfæri í FIXTEC F20+ línunni eru búin kolalausum mótorum og öll byggja þau á sama 20 V rafhlöðukerfinu.
Það þýðir líka að ekki þarf að nota sömu rafhlöðustærð á öll verkfæri.
Létt 2 Ah rafhlaða getur verið frábær á borvél eða skrúfvél þegar þyngdin skiptir máli, á meðan 4 eða 5 Ah rafhlaða hentar betur á orkufrekari verkfæri eða þegar langur vinnutími er mikilvægari.
Þetta er einmitt einn stærsti kosturinn við gott rafhlöðukerfi: þú velur rafhlöðuna eftir vinnunni.
Er brushless þess virði?
Fyrir nútíma rafhlöðuverkfæri er svarið í flestum tilfellum já, sérstaklega þegar verkfærið er mikið notað.
Skoðaðu úrvalið af FIXTEC F20+ kolalausum rafhlöðuverkfærum og veldu rafhlöðu eftir verkefninu – ekki eingöngu eftir stærð hennar.
Comments